عطره يفوح ولا فقد عنفوانه

]المجد حلم النفس ودروبه طوال....................مايوصله إلا من الله اعانه

وفي صفحة التاريخ يحيون الابطال...................تعيش اساميهم وكلاً وشانه

كم واحد ٍ تضرب به الناس الامثال
....................عايش زمن لكنّ ماهو زمانه

الجسم زال وطيب الذكر لا زال
...................عطره يفوح ولا فقد عنفوانه

والوقت ينسى اجيال ويخلد اجيال
....................وماكل منه طاول المجد صانه

الفقر سم الحال وثيابه سمال
....................وإلا الغنى سيف ٍ يزيدك متانه

والفقر ماهو شرط هو فقر الاموال
..................... كم واحد ٍ ماله سبايب هوانه

الفقر فقر العلم ودنو الآمال
.....................فقر الطموح اللي قصيرٍ عنانه

ماكل وجه تزيّنه حبة الخال
...........................وماكل رجّال ٍ لسانه حصانه

واللبس بعض احيان مايستر الحال
.........................كم واحد نظرة عيونه لسانه

والناس ماتكسب رضاها بالاقوال
........................تكسب رضاها بالوفا والامانه

واللي يخطب الود في طيب الافعال
.......................يصير له بقلوب الاجواد خانه

واللي يسوي له مكان ٍ ومنزال
............................مايقدر يسوي لنفسه مكانه